Glarner Spitzbuebe

Jää? A wer händ Si etz gad
tänggt? Es gääb wäärli mänge
Glarner Spitzbueb, wo mä
überne chännt schriibe. Aber Si
mönd etz gar nüd wiiter wer-
weisse. Ich luu mi nüd uf d Escht
use! Mini Glarner Spitzbuebe
sind nämmli nu gad Chräämli.
Gfunde hanis imene alte Betty-
Bossi-Chräämlibuech, woni vor
zig Jaare vu mim verstoorbne
Tante Leni ufne Wienacht
überchuu ha. Weleweg wene
ganz e Huuffe anderi Lüüt au,
bachi i dene pandeemische
Tääg, Wuche und Münet gad
schüü mii as früener – nüd
ummesust het i de Gstell vu de
Läde nüd nu z Läubipapiir
gfäält, ä ds Uur-Dinggelmeel
isch meischtens uusverchauft
gsii … Item, für e Teigg bruuchts
400 Gramm Meel. Das siibet
mä ine Teiggschüssle ine und git
dä 125 Gramm Zugger, andert-
halbs (!) Ei, 200 Gramm Angge,
weiche sött er sii, zwi Priise Salz
und eis Theelöffeli Vanillzugger
derzue. Us demm macht mä e
weiche Teigg. Der chunnt dä
fürne Stund a d Chüeli. Für d
Füllig nänd Si etz je 50 Gramm
teereti Zwätschge und Aprikose,
schneflets schüü fii, gänds ines
Schüsseli ine, lääred ei Esslöffel
Ruum (oder sust öppis Prännts)
drüber und lünd daas driissg
Minute zie. Dernaa chänd
50 Gramm bruune Zugger,
40 Gramm gmalni Mandle, e
Viertel abgribni Zitruuneschale,
e chliine grafflete Öpfel und e
halbs Ei drii (das händ Si ja nuch
vum Teig voorig, wos nu andert-
halbs pruucht het). Wämä alles
guet underenand macht, gits
e tiggs Mues druus.

Etz gaats äso richtig a ds
Chräämle. Dr Teigg wird tünn
uusgwalet und dä sticht mä
rundi Bletz uus. Öppen äso
gross, as mäs nuch guet chu i ds
Muul ineschoppe. Uf d Helfti vu
dene runde Bletz höggt mä i d
Mitti e knapps Theelöffeli vu dr
Füllig. De lääre Rändli rundum-
me striicht mä mit Eiklaar aa.
Bi der andere Helfti schniidt mä
i der Mitti süüferli es Chrüüz ii,
leit de dä über d Füllig uf disi
Bletz und truggt dr Rand guet
aa. As d Glarner Spitzbuebe dä
ä nuch schüü goldgelb glänzed
und e Gattig mached, striicht
mä nuch es Eigelb drüber.
Und etz ab i Ofe. Füfzeche bis
zwänzg Minute bi gueter Mittel-
hitz, aso bi 200 Grad.

Mich hets dä natüürli wunder
gnuu, öb das Rezept echt e
tradizionells Glarner Rezept sig.
Ich ha dä i mim eigete Fundus
ggrabe und bi weder bim Käthy
Knobel (Kochen im Glarner-
land) nuch bi de Glarner Land-
fraue (Chochchelle und Fänz-
löffel) fündig worde. Uf ne Tipp
abe, hamer dä i dr Landesbi-
blioteegg ds Jaarbuech 85 vum
Historische Verein usem Jaar
2005 uusglie. Det inne het d
Susanne Peter-Kubli es Choch-
buech vum Othmar Blumer mit
376 Rezept ediert. Nebscht
demm asi e Huuffe erfare ha
über ds Esse im Glarnerland i
der Mitti vum 19. Jaarhundert,
hämmer d Rezept dr Eermel
zimmli inegnuu. Ich ha tutti-
kwanti alli duregglese und
konschtatiert, as d Glarner schu
immer bim Süesse ires Nüech-
termaass vergesse händ. Aber ä
bim Bluemer bini nüd fündig
worde, was d Glarner Spitzbue-
be aagaat. Weleweg isch es
äsoo, as mä weged dr Glarner
Paschteete meint, alls wo
teereti Zwätschge dinne heb,
sig tüppisch glarnerisch. Oder
alles, was süess und glarne-
risch sig, mös teereti Zwätsch-
ge dinne ha. Ä Piiffeteggel: Ds
Betty Bossi het dene Chräämli
nu Glarner Spitzbuebe gseit,
wils eifach guet sind!